Baibul Mono Ada Pwonyo Gin Ango?

KA INENO karatac me akwana mo keken nyo lok angeya me telebijon, nyo i winyo lok angeya me redio, inongo ni gupong ki lok kom tim aranyi, lweny, ki turo cik! Tam kong pekki ma in itye kwede keken. Iromo bedo ki tam calo pa Yubu ma onongo kite ber, ma owaco ni ‘can obwoyo koma woko kwicikwici.’—Yubu 10:15, The Holy Bible in the Language of Today.

Itwero penye keni ni:

• Man mono aye gin ma Lubanga oyubo pira ki pi dano mukene-ni ducu?
• Ka kwene ma dong an atwero nongo iye kony me lweny ki pekki ma atye kwede-ni?
• Tika gen mo dok tye ni wabibedo ki kuc i lobo-ni?

Baibul miyo lagam ma mwonya i kom peny macalo magi ducu.

BAIBUL PWONYO NI LUBANGA BIKELO ALOKALOKA MAGI I LOBO.

En bijwayo pig wanggi woko ducu. To bene dong bibedo pe, kadi kumo nyo koko nyo arem.’—Niyabo 21:4

‘I kare meno lungolo bipye malo calo til, ki jo ma te lebgi oto gibicako wero wer ki yomcwiny.’ —Icaya 35:6

‘I kare meno lutowang wanggi biyabbe, jo ma itgi oding bene itgi biyabbe.’—Icaya 35:5

‘Kare bibino ma jo ducu ma tye i lyel gibikatti woko.’—Jon 5:28, 29

‘Pe tye dano mo ma bedo i lobowa ma biwaco ni, An koma lit.’—Icaya 33:24

‘Cam bene myero ocek mabup i lobo.’—Jabuli 72:16

NONG BAKACIC KI I JAMI MA BAIBUL PWONYO

Pe ikwer jami ma kiryeyo calo gin mo ma kore peke. Lubanga aye ma ocikke me kelo jami magi, dok Baibul tito kit ma en bikelone kwede.

Baibul bene konyo i yo mapol ma kato meno. Baibul obedo calo lagony boti ka imito nongo yomcwiny kikome kadi wa i kare-ni. Tam kong manok i kom par ki pekki ma itye kwede. Oromo bedo peko me lim, peko me kwo me ot, two, to pa danoni me amara. Baibul keken aye ma twero konyi me lweny ki pekki ma kit meno i kare-ni, Baibul bene kweyo cwinywa dok miyo lagam i kom peny mogo macalo magi:

• Pingo walimo can?
• Yo ango ma watwero lweny kwede ki par ma mako kit me kwo?
• I yo ango ma watwero weko kwowa me ot bedo me yomcwiny?
• Gin ango ma timme i komwa ka wato?
• Tika dok wabineno jo me amarawa ma dong guto woko-ni?
• I yo ango ma watwero bedo kwede labongo akalakala ni Lubanga bicobo cikke-ne pi jami ma tye i anyim?

Kit ma dong icako kwano buk man nyuto ni in imito niang gin ma Baibul pwonyo. Buk man bikonyi. Ibinongo ni paragraf ducu tye ki lapeny ma nongo kiketo ki piny i te pot karatac. Dano milion mapol dong gutyeko nongo mit me kwano lok me Baibul ki Lucaden pa Jehovah kun gitiyo ki lapeny ki lagam. Wageno ni in bene ibinongo mot pa Lubanga kit ma dong icako nongo mit pa kwano gin ma ada Baibul pwonyo-ni!

CAK NGEYO JAMI MATYE I BAIBULLI

BAIBUL tye ki bukke 66 ma mogo i kine obedo calo waraga. Wek tic kwede obed yot, kipoko iye i cura ki tyeng. Ka kiketo ginacoya i buk mo, mukwongo kicako ki keto nying buk moni me Baibul ka ingeye kiketo cura, ka dong tyeng lubo. Me lapor “2 Temceo 3:16” nongo tye ni waraga me aryo pa Temceo cura 3, tyeng 16.

Ibibedo ki ngec maber i Baibul ka ibedo ka yabo ginacoya ma nongo kitiyo kwede i buk man. Pingo dong pe icak yub me kwano Baibul cut? Ka ibedo ka kwano cura ma romo adek nyo kadi wa i abic nino ki nino, ci itwero tyeko kwano Baibul i kine ka mwaka acel.