Мүгәддәс Китаб әслиндә нә өјрәдир?

ИСТӘНИЛӘН гәзети охудугда, телевизора бахдыгда вә ја радиоја гулаг асдыгда бүтүн дүнјада ҹинајәтин, мүһарибәләрин вә терроризмин һөкм сүрдүјүнү ҝөрүрүк! Ејни заманда шәхси проблемләриниз һаггында да дүшүнүн. Ола билсин, әзизләриниздән киминсә хәстәлијинә вә ја өлүмүнә ҝөрә кәдәр ичиндәсиниз, бә’зән өзүнүзү «неҹә дә бичарәјәм» дејән Әјјуб кими һисс едирсиниз (Әјјуб 10:15).

Нөвбәти суалларын үзәриндә дүшүнүн:

• Аллаһ бизим белә јашамағымызы истәјирдими?
• Проблемләримизи һәлл етмәк үчүн көмәји һарадан ала биләрик?
• Јер үзүндә бир заман сүлһүн олаҹағына үмид етмәк олармы?

Мүгәддәс Китаб бу суаллара инандырыҹы ҹаваб верир.

МҮГӘДДӘС КИТАБ, АЛЛАҺЫН ЈЕР ҮЗҮНДӘ БЕЛӘ ҜӨЗӘЛ ДӘЈИШИКЛИКЛӘР ЕДӘҸӘЈИНИ ӨЈРӘДИР:

«Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» (Вәһј 21:4).

«Ахсаглар ҹејран кими һоппанаҹаг» (Јешаја 35:6).

«Корларын ҝөзләри... ачылаҹаг» (Јешаја 35:5).

«Гәбирләрдә оланларын һамысы... чыхаҹаглар» (Јәһја 5:28).

Һеч ким ««хәстәјәм» демәјәҹәк» (Јешаја 33:24).

«Өлкәнин зәмиләри бол» олаҹаг (Мәзмур 72:16).

МҮГӘДДӘС КИТАБЫ ТӘДГИГ ЕДИН

Дејиләнләри һәјата кечмәз бир арзу кими инкар етмәјә тәләсмәјин. Чүнки бу вә’дләри верән Аллаһдыр вә Мүгәддәс Китаб Онун бунлары неҹә јеринә јетирәҹәјини изаһ едир.

Бундан әлавә, Мүгәддәс Китаб артыг индидән мә’налы вә лајигли һәјат сүрмәјимизә көмәк едә биләр. Шәхси нараһатчылыгларыныз барәдә дүшүнүн. Мадди чәтинликләр, хәстәликләр, аилә проблемләри вә әзизләриниздән киминсә өлүмү һәјатынызы кәдәрли едән проблемләрдән јалныз бир нечәси ола биләр. Анҹаг Мүгәддәс Китаб онларын өһдәсиндән ҝәлмәјинизә вә ваҹиб суалларыныза ҹаваб вермәклә тәсәлли тапмағыныза көмәк едәр:

• Биз нә үчүн изтираб чәкирик?
• Һәјатын гајғыларынын өһдәсиндән неҹә ҝәлмәк олар?
• Аиләдә хошбәхтлијә неҹә наил ола биләрик?
• Инсан өләндә нә баш верир?
• Өлән әзизләримизлә нә вахтса ҝөрүшә биләрикми?
• Аллаһын бүтүн вә’дләрини јеринә јетирәҹәјинә неҹә әмин ола биләрик?

Бу китабы охумағыныз Мүгәддәс Китаб һәгигәтләрини тапмаг истәдијинизи ҝөстәрир. Бу нәшр Мүгәддәс Китабын әслиндә нә өјрәтдијини билмәјинизә көмәк едәҹәк. Диггәт јетирин ки, һәр сәһифәдә абзаслара даир суаллар вар. Милјонларла инсанлар Јеһованын Шаһидләри илә Мүгәддәс Китабы суал-ҹаваб васитәсилә өјрәнирләр. Үмид едирик ки, бу өјрәнмә үсулу сизин дә хошунуза ҝәләҹәк. Сизә сәмәрәли өјрәнмә арзу едирик. Гој Аллаһ Мүгәддәс Китабын әслиндә нә өјрәтдијини өјрәнмәк ҹәһдинизә хејир-дуа версин!

МҮГӘДДӘС КИТАБЛА ЈАХЫНДАН ТАНЫШ ОЛУН

МҮГӘДДӘС КИТАБ 66 китаб вә мәктубдан ибарәтдир. Истифадә едилмәси асан олсун дејә, онлар фәсилләрә вә ајәләрә бөлүнүб. Бу нәшрдә Мүгәддәс Китаб ајәләри ҝәтирилдикдә, китабын вә ја мәктубун адындан сонра ҝәлән биринҹи рәгәм фәсли, ики нөгтәдән сонракы рәгәм исә ајәни ҝөстәрир. Мәсәлән, «2 Тимотејә 3:16» јазыланда, бу ҝөстәрир ки, мә’лумат Тимотејә икинҹи мәктубун 3-ҹү фәслинин 16-ҹы ајәсиндә јерләшир.

Әҝәр бу китабда ҝәтирилән ајәләри ачсаныз, Мүгәддәс Китабдан истифадә етмәји даһа тез өјрәнәҹәксиниз. Мүгәддәс Китабы һәр ҝүн охумаға чалышын. Әҝәр һәр ҝүн үч-беш фәсил охусаныз, Мүгәддәс Китабы бир илә охујуб гуртара биләрсиниз.