Sendonbaga ye jɔni ye?

1. Daɲɛ min ye “Sendonbaga” ye, o kɔrɔ ye mɔgɔ ye min bɛ nkalon juguman tigɛ ka da mɔgɔ wɛrɛ la. “Sitanɛ” kɔrɔ ye jugu, walima kɛlɛbaga. Ninnu ye daɲɛw ye minnu dira Ala juguw kuntigi ma. Fɔlɔ, a tun ye mɛlɛkɛ dafalen ye sankolo la Ala kɛrɛfɛ. Nka o kɔfɛ, a ka yɛrɛbaya bonyana fɔ a ɲɛbɔra batoli fɛ, batoli min tun ka kan kɛ Ala ta ye.—Matiyu 4:8-10.

2. O mɛlɛkɛ in, n’o ye Sitanɛ ye, a kumana Hawa fɛ sa dɔ sababu fɛ. Sitanɛ kɛtɔ ka nkalon tigɛ, a ye se sɔrɔ Hawa kan walasa a ka Ala kanbila. O cogo de la, Sitanɛ ye min kɛlɛ o bɛ wele Ala ka “Masabaya”, walima Ala Kɔrɔtalenba jɔyɔrɔ. Sitanɛ nana ni siga ye Ala ka ko la, ka ɲininkali lawuli n’a y’a sɔrɔ Ala ka kan ka mara kɛ, ani n’a b’o kɛ a ka marakɔnɔmɔgɔw ka nafaw bɛɛ la fisaman kama. Sitanɛ ye siga don mɔgɔw ka kantigiya fana na ka ɲɛsin Ala ma. O ko kɛlen, Sitanɛ y’a yɛrɛ kɛ Ala jugu ye. O kosɔn, a nana wele Sitanɛ Sendonbaga.—Jenɛse 3:1-5; Job 1:8-11; Jirali 12:9.

3. Sitanɛ b’a ɲini ka mɔgɔw nɛgɛn walasa u k’a bato. (2 Kɔrɛntekaw 11:3, 14) A bɛ mɔgɔ lafili cogo minnu fɛ, o dɔ ye diinɛ nkalonma ye. Ni diinɛ dɔ bɛ mɔgɔ kalan nkalon na Ala ko la, a bɛ Sitanɛ sagonata yɛrɛ de kɛ. (Yuhana 8:44) Diinɛ nkalonma kɔnɔmɔgɔw bɛ se ka da a la ni kɔnɔnanjɛya ye k’u bɛ ka Ala lakika de bato. Nka, u bɛ ka baara kɛ Sitanɛ yɛrɛ de ye. Ale de ye nin “diɲɛ ka ala” ye.—2 Kɔrɛntekaw 4:4, NW.

Diinɛ nkalonma, jinɛweleli ani fasolafasa bɛ mɔgɔw lafili

4. Jinɛweleli ye cogo wɛrɛ ye min fɛ Sitanɛ bɛ mɔgɔw sama ka na a ka fanga jukɔrɔ. U bɛ se ka jinɛw wele u k’u lakana, ka kojugu kɛ mɔgɔ wɛrɛw la, ka sinikow fɔ walima ka kabakow kɛ. Sitanɛ ye fanga juguman ye min sen bɛ nin kɛwalew bɛɛ la. N’an b’a fɛ an ko ka diya Ala ye, an kana jinɛweleli fan si kɛ.—Dutɛrɔnɔmɛ 18:10-12; Kɛwalew 19:18, 19.

5. Sitanɛ bɛ mɔgɔ lafili fana ni siyawoloma ani politiki jɛkuluw batoli ye. Dɔw miiri la, u faso, walima u ka siya ka fisa ni tɔw ye. Nka, o tɛ tiɲɛ ye. (Kɛwalew 10:34, 35) Mɔgɔ dɔw b’u ɲɛsin politiki jɛkuluw ma walasa ka hadamaden ka kunkow ɲɛnabɔ. O cogo la, u b’u kɔdon Ala ka masaya ma. O Masaya dɔrɔn de bɛ se k’an kunkow ɲɛnabɔ.—Daniɛl 2:44.

I ka taa i ka Alako kalan fɛ walasa k’i kologɛlɛya Sitanɛ kama

6. Sitanɛ bɛ mɔgɔw lafili cogo min fana fɛ, o ye k’u kɔrɔbɔ ni nege juguw ye. Jehowa ko an k’an tanga kɛwale juguw ma bawo a b’a dɔn k’o kow bɛna bɔnɛ lase an ma. (Galasikaw 6:7, 8) Dɔw b’a kanu i ka fara u kan walasa k’o kow ɲɔgɔn kɛ. Nka, i hakili to a la ko tiɲɛ na, Sitanɛ yɛrɛ de b’a fɛ i ka o kow kɛ.—1 Kɔrɛntekaw 6:9, 10; 15:33.

7. Sitanɛ bɛ se ka tɔɔrɔ walima kɛlɛ wuli i la walasa i ka Jehowa bila. I ka mɔgɔ kanunen dɔw bɛ se ka dimin kosɛbɛ i kɔrɔ katuguni i bɛ Bibulu kalan. Dɔ wɛrɛw bɛna u ɲagaribɔ i la. Nka, i ka ɲɛnamaya sababu bɔra jɔni de la? Sitanɛ b’a fɛ k’i lasiran walasa i k’i ka alako kalan dabila. I kana a to Sitanɛ ka se i la dɛ! (Matiyu 10:34-39; 1 Piɛre 5:8, 9) Ni y’i kologɛlɛya Sendonbaga kama i bɛ se ka Jehowa nisɔndiya, k’a jira ko i b’a ka masabaya kɔkɔrɔdon.—Ntalenw 27:11.

Copyright © 2011 Watch Tower Bible and Tract Society of Pennsylvania. All rights reserved.