Jé Kalate Zambe a tu’a ye’ele?

LAÑ avale kalate mefoé ase. Yene bingeñgeñ, nge na vô’ôlô’ô radio. Minkañete mewôé me bôt a bita mi ne été ne vôô! Ô beta bak a minju’u miôé womien. Éyoñ éziñ ôkon nge awu ya môte wo to ô nye’e da bo wo nlem mintaé. É ne kui na ô wô’ôtan ane mbamba môt Job, nye a nga jô na a nto “njalan a éngôngô ne lut.”−Job 10:15, La Bible du Semeur.

Sili’i ñhe womiene na:

• Ye ana nye Zambe a nga sôñ mfa’a wom a mfa’a bôte bese ya si?
• Nne m’aye yene mvolane ya kôme minju’u miame vé?
• Ye ndi nlem éziñ é ne fo’o na môs éziñ, si nyi j’aye bo njalan a mvo’é?

Kalate Zambe a ve biyalan bi ayian asu minsili mite mise.

KALATE ZAMBE A YE’ELE NA ZAMBE A YE BO NA MAM MA ME TÔÉBANE SI VA.

“A ye fimi mili’i mese mise map; a awu de aye fe bo; nalé fe ôlun vi aye fe bo.”−Nlitan 21:4

“Mbôbô’ô w’aye tyele si aval ane nnôm nkok.”−Ésaïe 35:6

“Mis mindindim m’aye kuiban.”−Ésaïe 35:5

“Bôte bese be ne mesoñ …be aye so.”−Jean 5:28, 29

“A môt a to été a ye bo te jô na ‘M’akon.’”−Ésaïe 33:24

“Abui bidi d’aye bo si nyô.”−Besam 72:16

MVOLAN WO SO BIA MIÑYE’ELANE YA KALATE ZAMBE

Te ji’a tyi’i na mam bia te yene le me ne ve befe’e bia vek. Zambe a nga ka’a na a ye mane tôé mese, a Kalate Zambe a timine bia aval a ye bo.

Ve Kalate Zambe a beta ke ôsu. A liti wo aval ô ne nyiñe den ô bili benya meva’a nleme wôé été. Tame nyoñe mon éyoñe ya fas ajô ya mame wo mate a ma m’akumetane wo nlem. Me ne fombô ajô ya azoé, mejô ya nda bôt, akon, nge awu ya môte wo too ô nyeke’e. Kalate Zambe a ne volô wo na ô dañ mam mete den, a a ne ve wo ngule ya jibi a zene ya biyalan a ve minsili mi:

• Amu jé bia tôbane minjuk?
• Aval avé bi ne dañe mam m’akumetane bia minlem?
• Aval avé bi ne bo na nda bôte jangan é tabe mevak?
• Ye ényiñe ja ke ôsu mvus awu?
• Ye bia ye beta yene bôte bia nye’e be nga wu?
• Nne bi ne tabe ndi nlem aya na Zambe a ye tôé mam mese a nga kak?

Nlañane wo lañe kalate nyi wo liti na wo kômbô yeme jôme Kalate Zambe a ye’ele. Kalate nyi a ye volô wo. Étun ntilan ése ya kalate nyi é bili nsili wo tôbane wô ô to ntilan afep si. Bizu’u bi bôt bia nye’e bi bela’ane fatan ñye’elan ya minsili a biyalan, éyoñe b’ayé’é Kalate Zambe a Bengaa be Yéhôva. Bia simesane na wo fe wo ye wô’ô avale da. Zambe a bota’ane wo nté wo taté a nleme ôse ésaé jôé na, wo jeñe ñyemane ya jé Kalate Zambe a tu’a ye’ele.

YEMBA’AN A KALATE ZAMBE WÔÉ

Kalate Zambe a bili bekalate 66. Mfa’a ya kui nye tyi’ibi, Kalate Zambe a ne nkaban bekabetôlô a bifus. Éyoñ éfus ya Kalate Zambe é ne ntilane kalate été, nombo ôsu a ne été ya kabetôlô ya kalate; nombo a tôñe valé a ne été ya éfus. Bi tame nyoñ éve’an “2 Timothée 3:16” a tinane na, kalate baa Timothée, kabetôlô 3, éfus 16.

Wo ye ji’a yemban a Kalate Zambe nge wo lañe bifuse bise bi ne kalate nyu été. Nga ô ne taté na wo lañe Kalate Zambe môs ôse? Nge wo lañe Bekabetôlô belal, nge betan môs ôse, wo ye mane lañe Kalate Zambe ase mbu wua.