Mɛni Tutuutu Ji Baiblo ɔ Tsɔɔmi?

MOO kane adafi fiami womi. Hyɛ television, aloo bu redio tue. O maa na kaa yiwutso ní peepeehi, ta hwumi, kɛ awi yemi he amaniɛ bɔmihi pɔ he fuu! Mo susu mo nitsɛ o haomi ɔmɛ a he nɛ o hyɛ. Eko ɔ, hiɔ aloo o suɔlɔ ko gbenɔ ha nɛ o hao saminya. Eko ɔ, o sane ɔ ngɛ kaa nyumu anɔkuafo Hiob nɔ́ ɔ. E de ke, “haomi bɔle mi kɛ kpe.”—Hiob 10:15, The Holy Bible in the Language of Today.

Mo bi o he ke:

• Anɛ kikɛ ji bɔnɛ Mawu to ha imi kɛ adesahi tsuo lo?
• Jije ma ná yemi kɛ buami kɛ je nɛ ma kɛ da ye haomi ɔmɛ a nya?
• Anɛ hɛ nɔ kami ko ngɛ kaa tue mi jɔmi maa ba zugba a nɔ ligbi ko lo?

Sane bimi nɛ ɔmɛ a hetohi nɛ jɔɔ nɔ bua ngɛ Baiblo ɔ mi.

BAIBLO Ɔ TSƆƆ KAA MAWU MAA NGƆ TSAKEMI NƐ ƆMƐ KƐ BA ZUGBA A NƆ.

“Mawu ma tsu a hɛ mi vonyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu.”—Kpojemi 21:4

‘Obubuafohi maa tuu kaa odabɔ loo afugbɛ.’—Yesaya 35:6

“Hɛ yuyuili maa hyɛ nɔ́ ekohu.”—Yesaya 35:5

“Nihi tsuo nɛ ngɛ yɔkɔ ɔmɛ a mi ɔ maa . . . je kpo.”—Yohane 5:28, 29, Somi He Ɔ

“Nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’”—Yesaya 33:24

Zugba a maa ba ní saminya, nɛ a ma ná blɛfo babauu.’—La 72:16

MO NÁ NƆ́ NƐ BAIBLO Ɔ TSƆƆ HE SE

O kɛ esɔ yemi nɛ ko kua níhi nɛ a tu a he munyu ɔ kaa a ji nlamihi kɛkɛ. Mawu wo si kaa e ma ha ní nɛ ɔmɛ tsuo maa ba mi, nɛ Baiblo ɔ tsɔɔ blɔ nɔ nɛ e maa gu kɛ pee jã.

Se Baiblo ɔ he ngɛ se nami ngɛ blɔ kpahi fuu a nɔ. E maa tsɔɔ mo bɔnɛ o maa pee kɛ ná bua jɔmi nitsɛ ngɛ si himi mi amlɔ nɛ ɔ po. Mo susu mo nitsɛ o haomi ɔmɛ a he be kpiti nɛ o hyɛ. Eko ɔ, ohia, loo weku mi sanehi, loo hiɔ ngɛ mo haoe, loo eko ɔ, o nɔ ko gbo. Baiblo ɔ ma nyɛ maa ye bua mo nɛ o tsu o haomi ɔmɛ a he ní, nɛ e ma nyɛ ma ha sane bimi nɛ nyɛɛ se nɛ ɔmɛ a heto nɛ o tsui maa nɔ o mi. Lɔɔ mɛ ji:

• Mɛni heje wa naa nɔ́?
• Mɛni blɔ nɔ wa maa gu kɛ da si himi ɔ mi haomi ɔmɛ a nya?
• Mɛni wa maa pee konɛ wa weku si himi nɛ pee bua jɔmi?
• Ke nɔmlɔ gbo ɔ, mɛni si fɔfɔɛ mi e ya jee?
• Anɛ wa maa na wa suɔli nɛ gbo ɔ ekohu lo?
• Kɛ wa maa pee kɛ ná nɔ mi mami kaa Mawu si womi nɛ kɔɔ hwɔɔ se he ɔ maa ba mi kɛɛ?

Womi nɛ ɔ nɛ o ngɛ kanee ɔ tsɔɔ kaa o suɔ nɛ o le nɔ́ nɛ Baiblo ɔ tsɔɔ. Womi nɛ ɔ maa ye bua mo. Mo kadi kaa kuku ɔmɛ tsuo ngɛ sane bimihi ngɛ sisi. Nimli akpeakpe abɔ bua jɔ sane bimi kɛ heto hami nɛ Yehowa Odasefoli kɛ tsuɔ ní ke a kɛ mɛ ngɛ Baiblo ɔ kasee ɔ he. Wa heɔ yeɔ kaa mo hu o bua maa jɔ he. Mawu nɛ jɔɔ mo ngɛ nɔ́ tutuutu nɛ Baiblo ɔ tsɔɔ nɛ haa nɔ tsui nɔɔ e mi nɛ o bɔni kasemi nɛ ɔ he!

MOO LE O BAIBLO Ɔ

WOMIHI 66 nɛ ngɛ Baiblo ɔ mi. A gba a mi kɛ wo yi kɛ kukuhi a mi, bɔnɛ pee nɛ ngmamihi a nami nɛ ko ye. Ke a tsɛ ngmami ko ngɛ womi nɛ ɔ mi ɔ, kekleekle yibɔ ɔ nɛ nyɛɛ womi ɔ biɛ se ɔ tsɔɔ e yi, nɛ yibɔ nɛ tsa nɔ ɔ tsɔɔ e kuku. Kaa nɔhyɛ nɔ́ ɔ, ngmami nɛ ji “2 Timoteo 3:16” tsɔɔ womi enyɔne nɛ a ngma ya ha Timoteo, yi 3, kuku 16.

Ke o bɔni ngmamihi nɛ a tsɛ ngɛ womi nɛ ɔ mi kanemi ɔ, e be kɛe kulaa nɛ o ma ba le Baiblo ɔ blimi. Jehanɛ ɔ se, mɛni he nɛ o be blɔ nya toe konɛ o bɔni Baiblo ɔ kanemi daa ligbi? Ke o kane yi etɛ kɛ ya si enuɔ daa ligbi ɔ, o ma nyɛ maa kane Baiblo mluku ɔ ngɛ jeha kake mi.