?Wanem Samting We Baebol i Rili Tijim?

TINGBAOT se wan dei yu stap wokbaot long rod nao wantaem nomo win i blo strong. Skae i kam tudak. Laetning mo tanda i faerap, mo bigbigfala ren i foldaon. Naoia yu stat lukaot wan ples blong haed. Yu resis folem rod gogo yu luk wan ples we yu save haed gud long hem. Ples ya i strong gud, ren i no save go insaed, mo yu luk se bambae yu sef insaed long hem. !Ating yu harem gud tumas blong go haed kwiktaem long ples ya!

² Yes, ol trabol long wol tede oli olsem strong win, laetning, tanda mo bigbigfala ren. Oli stap kam antap oltaem. Be i gat wan ples i stap we i sef. Long ples ya yumi save haed, blong bambae ol trabol oli no spolem yumi. ?Wanem ples blong haed ya? Ridim wanem Baebol i tijim long saed ya i se: “Bambae mi mi talem long Jeova se: ‘Yu yu olsem wan sef ples, yu yu olsem strongfala haos we man i save go haed long hem. Yu yu God blong mi, mi mi trastem yu.’ ”—Ol Sam 91:2, NW.

³ !Yu traem tingbaot samting ya! Jeova we i Wokem olgeta samting mo we i Haefala Rula blong heven mo wol i save lukaotgud long yu. Hem i save mekem yu yu harem sef from we hem i gat moa paoa i bitim eni man no eni samting we maet i save kam spolem yu. Mo nating sipos smol kil i kasem yu, Jeova i save karemaot soa ya long yu. ?Be, olsem wanem yumi save go haed long Jeova? Yumi mas trastem hem. Mo tu, Baebol i talem se: “Yufala i mas stap long laef ya we oltaem yufala i save se God i stap lavem yufala.” (Jud 21) Yes, yumi mas save oltaem se God i lavem yumi, i min se strong lav i mas joenem yumi oltaem long Papa blong yumi long heven. Taem yu mekem olsem nao bambae yu sua fulwan se hem i sefples we yu yu save go haed long hem. ?Be olsem wanem yu save wokem lav ya we bambae i joenem yu long Jeova?

LUKSAVE LAV BLONG GOD MO MEKEM SAMTING

⁴ Blong stap long laef ya we oltaem God i lavem yumi, yumi mas luksave olsem wanem Jeova i stap soemaot lav long yumi. Tingbaot sam tijing blong Baebol we yu lanem taem yu bin stadi long buk ya. Jeova i wokem olgeta samting mo hem i givim wol ya long yumi olsem hom blong yumi. Hem i fulumap wol ya wetem wota mo plante kakae, i mekem graon i rij, mo i wokem ol defdefren kaen anamol, mo ol naesfala ples we man i save stap long hem mo harem gud. Jeova i givim Baebol tu, we i talemaot nem blong hem mo ol nambawan fasin blong hem. Antap long hemia, Baebol i soemaot long yumi se Jeova i sanem stret Pikinini blong hem i kamdaon long wol ya. Pikinini ya blong hem, Jisas, i safa mo i ded blong sevem yumi. (Jon 3:16) ?Sakrefaes ya i mekem wanem long yumi? Hem i openem rod blong yumi save gat wan gudfala laef long fiuja.

⁵ Be blong yumi kasem gudfala laef ya long fiuja, i gat wan narafala samting bakegen we God i stanemap. Jeova i stanemap wan gavman long heven, hemia Kingdom we Mesaea i rul long hem. I no longtaem, Kingdom ya bambae i karemaot ol trabol long wol ya mo mekem i kam wan paradaes. !Tingbaot samting ya! Bambae yumi save laef long ples we i gat pis mo glad gogo i no save finis. (Ol Sam 37:29) Be bifo long hemia, God i givim ol advaes long yumi blong yumi save gat wan gudfala laef naoia. Mo tu, hem i givim nambawan presen ya long yumi hemia prea, we i mekem se yumi save toktok oltaem wetem hem. Hemia sam long ol samting we Jeova i mekem blong soem se hem i lavem ol man long wol wetem yu tu.

⁶ Be wan impoten kwestin blong tingbaot nao, hemia se: ?Yu bambae yu mekem wanem from we Jeova i soemaot lav ya long yu? Plante long yumi maet yumi se, “Mi mi mas soem lav long Jeova tu.” ?Hemia filing we yu yu gat long Jeova? Jisas i givim loa ya we i hae moa long ol narafala loa se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) I gat plante plante samting we i save pulum yu blong lavem Jeova God. Be fasin blong lavem Jeova wetem olgeta hat, laef, mo tingting blong yu i no mas stap olsem wan filing nomo.

⁷ Baebol i soemaot se lav we yumi gat long God i no jes wan filing nomo. I tru, i impoten blong gat filing ya we yumi lavem Jeova. Be filing ya hem i stat nomo blong trufala lav ya we yumi mas gat long hem. Tingbaot pijatok ya. Sid blong wan frut i impoten from we sid ya nao we bambae i gru i kam wan tri we i karem frut. ?Be sipos wan man i givim wan sid nomo long yu taem yu wantem kakae frut, bambae yu haremgud? !Nogat! Hemia i sem mak long lav we yumi gat long Jeova God. Filing blong lav hemia faswan samting we yumi gat. Be hem i mas gru mo karem frut. Baebol i tijim yumi se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Yes, taem yumi gat trufala lav long God, lav ya i karem frut long laef blong yumi. Yumi mas soemaot lav ya long ol wok mo fasin blong yumi.—Matiu 7:16-20.

⁸ Yumi soem se yumi lavem God taem yumi obei long ol loa blong hem mo yumi mekem laef blong yumi i laenap wetem ol rul blong hem. I no had bitim mak blong mekem olsem. Ol loa blong Jeova oli no strong tumas. Jeova i putum ol loa ya blong oli halpem yumi blong gat wan laef we i gud, i hapi mo i mekem yumi harem gud. (Aesea 48:17, 18) Taem yumi letem Jeova i lidim laef blong yumi, yumi soem long Papa blong yumi se yumi rili gat tangkiu long hem from evri samting we hem i mekem blong yumi. Sore tumas, smol man nomo tede oli soem tangkiu olsem. Yumi no mas kam olsem sam man long taem blong Jisas, we oli no gat tangkiu. Taem Jisas i hilim ten man we oli gat sik ya leprosi, i gat wan man nomo we i kambak blong talem tangkiu long hem. (Luk 17:12-17) I nogud yumi mekem olsem ol naen narafala man ya we oli no talem tangkiu. !Yumi mas mekem olsem hemia we i kambak blong talem tangkiu!

⁹ ?Ale, wanem ol loa blong Jeova we yumi mas folem? Yumi tokbaot plante long ol loa ya finis long buk ya. Be i gud yumi tingtingbak long sam long ol loa ya. Fasin blong obei long ol loa blong God i save halpem yumi blong stap long laef ya we oltaem God i lavem yumi.

KAM KLOSAP MOA LONG JEOVA

¹⁰ Taem yu traem save moa se Jeova i olsem wanem, samting ya i save halpem yu blong kam klosap moa long hem. Yumi neva mas stop blong mekem samting ya. Tingbaot sipos yu sidaon afsaed long naet mo ples i kolkol we i kolkol. Ale yu stap wom klosap long wan faea. ?Bambae yu sidaon nomo mo wajem se faea i godaon gogo i ded? Nogat. Bambae yu stap putum wud long hem blong mekem se hem i bigwan mo i hot gud oltaem. !Tru ya, ating laef blong yu i dipen long faea ya se i mas hot gud! Olsem wud ya we i mekem faea i laet, ale save blong yu long saed blong God bambae i mekem we lav blong yu long Jeova i stap strong.—Ol Proveb 2:1-5.

¹¹ Jisas i wantem we ol man blong hem oli no lusum lav we oli gat long Jeova mo ol sas trutok we oli stap long Tok blong Hem. Lav ya i mas bigwan oltaem olsem wan faea we i laet. Afta we Jisas i laef bakegen long ded, hem i tijim tu disaepol blong hem long sam profet tok we Hibru haf blong Baebol i bin talemaot, mo we oli kamtru long hem. ?Save ya i mekem wanem long tufala? Tufala i talem se: “Man. Taem hem i stap toktok long yumitufala long rod, i stap talemaot ol tok ya blong Baebol, tok blong hem i nambawan, i mekem yumi harem gud tumas.”—Luk 24:32.

¹² Fastaem we yu bin lanem wanem we Baebol i tijim, ating yu harem long hat blong yu se yu glad, yu lavem God moa, mo i olsem we wan faea i laet insaed long yu. Plante man oli harem olsem taem oli lanem save blong God. Be samting we i no isi blong mekem naoia, hemia blong holemtaet lav ya mo mekem hem i gru moa. Yumi no mas folem bigfala tingting we i stap long wol tede. Jisas i bin talem se: “Bighaf blong ol man bambae oli no moa lavem God.” (Matiu 24:12) ?Olsem wanem yu save lukaotgud se lav we yu yu gat long Jeova mo long ol trutok blong Baebol i no kam kolkol?

¹³ Yu mas gohed blong tekem save long saed blong Jeova God mo Jisas Kraes. (Jon 17:3) Tingting dip long ol samting we yu lanem long Tok blong God mo askem kwestin ya se: ‘?Samting ya i tijim mi long wanem samting long saed blong Jeova God? ?Olsem wanem samting ya i save halpem mi moa blong lavem Jeova wetem olgeta hat, tingting, mo laef blong mi?’ (1 Timoti 4:15) Fasin ya blong tingting dip bambae i mekem we lav blong yu long Jeova i stap strong oltaem olsem wan faea we i laet.

¹⁴ Wan narafala rod blong mekem we lav blong yumi long Jeova i stap strong oltaem olsem wan faea we i laet bigwan, hemia blong prea oltaem. (1 Tesalonaeka 5:17) Long Japta 17 blong buk ya, yumi lanem se prea i wan sas presen we God i givim. Fasin fren blong yumi wetem Jeova i save stap gud mo strong taem yumi prea long hem evri dei, sem mak olsem we tu man tufala i save fren oltaem sipos tufala i no haedem samting long tufala, be tufala i toktok oltaem tugeta. I impoten tumas blong no letem ol prea blong yumi oli kam olsem samting we yumi ripitim nomo baehat. Fasin olsem i no gat filing mo ol tok we yumi talem i no gat mining tu. Yumi mas toktok long Jeova olsem we wan pikinini i toktok long papa blong hem we i hem i lavem tumas. I tru, yumi toktok long Jeova wetem respek, be yumi no gat tu fes, yumi tok tru, mo ol tok blong yumi oli kamaot long hat. (Ol Sam 62:8) Stadi wanwan mo prea we i kamaot long hat, hemia tu i impoten haf blong wosip blong yumi, mo tufala samting ya i save halpem yumi blong stap long laef ya we oltaem God i lavem yumi.

KASEM GLAD LONG WOSIP BLONG YU

¹⁵ Stadi Baebol yumi wan mo prea, oli pat blong wosip blong yumi we yumi mekem yumi wan nomo. Be naoia bambae yumi tokbaot wan pat blong wosip we yumi mekem long fes blong ol man. Hemia taem yumi talemaot bilif blong yumi. ?Yu yu serem ol trutok blong Baebol finis wetem narafala man? Sipos yu mekem samting ya finis, yu bin kasem wan bigfala ona. (Luk 1:74) Taem yumi talemaot ol trutok we yumi lanem long saed blong Jeova God, yumi stap joen long impoten wok ya we God i givim long olgeta trufala Kristin. Hemia wok blong talemaot gud nius blong Kingdom blong God.—Matiu 24:14; 28:19, 20.

¹⁶ Aposol Pol i tingbaot wok ya olsem samting we i impoten tumas, hem i se wok ya i wan gudfala samting. (2 Korin 4:7) Beswan wok we yu save mekem hemia wok ya blong tokbaot Jeova God mo ol stamba tingting blong Hem. Yumi mekem wok ya blong wan Masta we i moagud i bitim ol narafala masta, mo wok ya i karem blesing we i moagud i bitim eni narafala samting. !Taem yumi joen long wok ya, yumi stap halpem ol man we hat blong olgeta i stret, blong oli kam klosap long Papa blong yumi long heven, mo blong oli stat wokbaot folem rod ya we bambae i go kasem laef we i no save finis! ?Yu yu save tingbaot wan wok we i gud moa i bitim hemia? Mo tu, taem yumi givim witnes long saed blong Jeova mo Tok blong hem, yumi mekem bilif blong yumi wan mo lav we yumi gat long hem i kam strong moa. Mo Jeova i glad tumas long ol traehad we yumi mekem long saed ya. (Hibrus 6:10) Sipos yu stap bisi oltaem long wok ya, samting ya i save halpem yu blong stap long laef ya we oltaem God i lavem yu.—1 Korin 15:58.

¹⁷ I impoten blong tingbaot se i no gat plante taem i stap blong mekem wok blong talemaot Kingdom. Baebol i talem se: “Oltaem yu yu mas strong blong talemaot [tok blong God].” (2 Timoti 4:2) ?From wanem yumi mas strong moa blong talemaot tok ya tede? Baebol i talem se: “Bigfala dei blong Jeova i klosap. Hem i klosap, mo hem i hareap tumas.” (Sefanaea 1:14, NW) Yes, taem ya we bambae Jeova i spolem fulwan rabis fasin blong wol blong naoia, i stap kam hareap. !Ol man oli mas kasem woning! Oli mas save se naoia i taem blong jusum Jeova olsem Rula blong olgeta. En blong wol ya bambae “i no save let.”—Habakuk 2:3, NW.

¹⁸ Jeova i wantem we yumi wosipim hem long kampani blong ol narafala trufala Kristin. Taswe Baebol i talem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [“kongregesen,” NW], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” (Hibrus 10:24, 25) Taem yumi hivap wanples wetem ol narafala Kristin long miting, yumi gat nambawan janis blong presem mo wosipim God blong yumi we yumi lavem hem tumas. Mo tu, long ol miting olsem, yumi save lefleftemap tingting blong yumi mo mekem bilif blong yumi i kam strong moa.

¹⁹ Taem yumi joen wetem ol narafala man blong Jeova, yumi mekem lav mo fasin fren bitwin yumi insaed long kongregesen i kam strong moa. I impoten we yumi traem lukluk samting we i gud long saed blong narafala, sem mak olsem we Jeova tu i stap lukluk ol gudfala fasin blong yumi. Yu no mas ting se ol Kristin brata sista blong yu oli save mekem evri samting i stretgud olgeta oltaem. Yu mas tingbaot se sam oli olfala long saed blong spirit mo sam oli niu long trutok, mo yumi evriwan i stap mekem mastik. (Kolosi 3:13) Traem kam gudfren blong ol man we oli rili lavem Jeova. Bambae samting ya i halpem yu blong gru long saed blong spirit. Yes, taem yu wosipim Jeova long kampani blong ol Kristin brata mo sista blong yu samting ya i save halpem yu blong stap long laef ya we oltaem God i lavem yu. ?Olsem wanem Jeova i blesem ol man we oli wosipim hem wetem bilif mo oli traehad blong stap long laef ya we oltaem God i lavem olgeta?

TRAEHAD BLONG KASEM “LAEF YA WE I PRAPA WAN”

²⁰ Presen we Jeova i givim long ol gudfala man blong hem, hemia laef. ?Be wanem kaen laef ya we Jeova i givim? ?Yu yu ting se yu stap laef naoia? Ating bambae yu talem se yes yu laef ya, from we yu stap pulum win, yu stap kakae mo yu stap dring. Mo, taem ol samting long laef blong yu oli gogud, maet yu talem tu se, “!Man, laef olsem i rili gud tumas!” Be Baebol i soemaot se i no gat wan man long wol ya tede, we i rili laef.

²¹ Tok blong God i talem se yumi mas traem “kasem laef ya we i prapa wan.” (1 Timoti 6:19) Ol tok ya oli soemaot se “laef ya we i prapa wan” hem i wan samting we yu save kasem long fiuja. Yes, taem bambae yumi stretgud olgeta, yumi save laef olsem we God i bin wantem fastaem. Taem yumi laef long paradaes long wol ya, bambae bodi blong yumi i strong gud, yumi laef long pis, mo yumi glad. Long taem ya nao bambae yumi rili gat “laef ya we i prapa wan” — hemia laef ya we i no save finis. (1 Timoti 6:12) ?Yu yu glad long nambawan hop ya?

²² ?Olsem wanem yumi save “kasem laef ya we i prapa wan”? Long semfala japta ya blong Fas Timoti, Pol i talem long ol Kristin se i gud oli ‘mekem ol gudfala wok’ mo oli “kam rij long fasin ya.” (1 Timoti 6:18) Yes, hemia i soemaot klia se laef ya we i prapa wan i dipen bigwan long fasin we yumi mekem folem ol trutok we yumi lanem long Baebol. ?Be yu ting se Pol i stap minim se “laef ya we i prapa wan” hem i olsem wan pei we yumi kasem from gudfala wok we yumi mekem? Nogat. Nambawan fiuja ya i kamaot long “gladhat blong God” nomo. (Rom 5:15) Jeova i glad tumas blong givim laef ya olsem wan presen long ol man we oli mekem wok blong hem wetem strong bilif. Hem i wantem tumas we yu yu kasem “laef ya we i prapa wan.” Olgeta we oli stap long laef ya we oltaem God i lavem olgeta, oli save kasem laef we i no save finis, wan laef we i hapi mo i gat pis long hem.

²³ I gud we yumi askem se: ‘?Mi mi stap wosipim God long fasin we hem i talem long Baebol?’ Sipos yumi meksua evri dei se ansa blong kwestin ya hem i ‘yes’, ale yumi stap folem stret rod. Yumi save sua se Jeova i ples blong haed blong yumi. Bambae hem i lukaotgud long ol man blong hem long ol trabol taem naoia, gogo kasem en blong wol ya. Yes, bambae Jeova i sevem yumi, mo i tekem yumi, yumi go long niufala wol ya we i klosap nao. !Bambae yumi glad we yumi glad bigwan blong stap long taem ya! !Bambae yumi glad tu se yumi bin jusum blong wokbaot long rod we i stret long ol las dei ya! !Sipos yu jusum rod we i stret naoia, bambae yu save harem gud long “laef ya we i prapa wan,” hemia laef blong olwe we Jeova God i bin wantem man blong kasem!

---