Ի՞նչ է սովորեցնում Աստվածաշունչը իրականում

ԿԱՐԴԱ ցանկացած լրագիր, դիտիր հեռուստացույց կամ լսիր ռադիո։ Ամենուրեք կլսես լուրեր հանցագործության, պատերազմի և ահաբեկչության մասին։ Իսկ հիմա մտածիր քո անձնական խնդիրների մասին։ Թերևս հիվանդությունը կամ հարազատի մահը քեզ մեծ վիշտ է պատճառում, ու դու էլ ես Հոբ անունով բարի մարդու նման մտածում, որն ասաց. «Թաղված եմ թշվառության մեջ» (Յոբ 10։15, The Holy Bible in the Language of Today)։

Հարցրու ինքդ քեզ.

• Արդյոք սա՞ էր Աստված նպատակադրել ողջ մարդկության, ինչպես նաև ինձ համար։
• Որտե՞ղ կարող եմ օգնություն գտնել խնդիրներս հաղթահարելու համար։
• Արդյոք որևէ հույս կա՞, որ երկրի վրա երբևէ խաղաղություն կլինի։

Այս բոլոր հարցերին Աստվածաշունչը բավարարող պատասխաններ է տալիս։

ԱՍՏՎԱԾԱՇՈՒՆՉԸ ՍՈՎՈՐԵՑՆՈՒՄ Է, ՈՐ ԱՍՏՎԱԾ ՀԵՏԵՎՅԱԼ ՓՈՓՈԽՈՒԹՅՈՒՆՆԵՐՆ Է ԿԱՏԱՐԵԼՈՒ ԵՐԿՐԻ ՎՐԱ

«Կ’ջնջէ Աստուած բոլոր արտասուքը նորանց աչքերիցը. եւ մահն այլեւս չի լինիլ, ոչ սուգ, եւ ոչ աղաղակ. եւ ոչ ցաւ այլեւս չի լինիլ» (Յայտնութիւն 21։4)

«Կաղը եղջերուի պէս պիտի ցատկռտէ» (Եսայիա 35։6, ԱԱ)

«Բացուելու են կոյրերի աչքերը» (Եսայիա 35։5)

«Ամենքը՝ որ գերեզմաններումն են.... դուրս կ’գան» (Յովհաննէս 5։28, 29)

«Հոն բնակողը պիտի չըսէ. «Հիւանդ եմ»» (Եսայիա 33։24, ԱԱ)

«Ցորենի առատութիւն կ’լինի երկրի մէջ» (Սաղմոս 72։16)

ՕԳՈՒՏՆԵՐ ՔԱՂԻՐ ԱՍՏՎԱԾԱՇՆՉԻ ՈՒՍՄՈՒՆՔՆԵՐԻՑ

Մի շտապիր մերժել ներկայացված տեղեկությունը՝ համարելով այն զուտ անիմաստ երազանք։ Աստված խոստացել է իրականություն դարձնել այդ ամենը, և Աստվածաշունչը բացատրում է, թե նա ինչպես է դա իրագործելու։

Սակայն Աստվածաշունչը ավելին է անում. այն տալիս է քեզ միջոցը, որով կարող ես իսկական բավականություն պատճառող կյանք վայելել նույնիսկ հիմա։ Իսկ հիմա մտածիր քո՛ անձնական մտահոգությունների և հոգսերի մասին։ Դրանք կարող են լինել ֆինանսական խնդիրները, ընտանեկան պրոբլեմները, վատ առողջությունը կամ սիրելի հարազատի կորուստը։ Աստվածաշունչը կարող է օգնել քեզ հաղթահարելու այդ խնդիրներն այսօր, ինչպես նաև կարող է թեթևացում բերել քեզ՝ պատասխանելով այնպիսի հարցերի, ինչպիսիք են.

• Ինչո՞ւ ենք տառապում։
• Ինչպե՞ս կարող ենք հաղթահարել կյանքի հոգսերը։
• Ինչպե՞ս կարող ենք մեր ընտանեկան կյանքը ավելի երջանիկ դարձնել։
• Շարունակվո՞ւմ է արդյոք կյանքը մահից հետո։
• Կտեսնե՞նք նորից մեր մահացած հարազատներին։
• Ինչո՞ւ կարող ենք վստահ լինել, որ Աստված կիրագործի ապագայի մասին իր տված խոստումները։

Այն փաստը, որ կարդում ես այս գիրքը, արդեն իսկ ցույց է տալիս, որ ցանկություն ունես իմանալու, թե ինչ է սովորեցնում Աստվածաշունչը։ Այս գիրքը կօգնի քեզ այդ հարցում։ Ուշադրություն դարձրու, որ պարբերությունների համար յուրաքանչյուր էջի ներքևում տրված են համապատասխան հարցեր։ Միլիոնավոր մարդիկ են բավականություն ստացել Եհովայի վկաների հետ հարց ու պատասխանով Աստվածաշունչն ուսումնասիրելու այս մեթոդից։ Հուսով ենք՝ դու նույնպես բավականություն կստանաս։ Թող որ Աստծու օրհնությունները քեզ հետ լինեն, մինչ դու մեծ գոհունակություն և ուրախություն ես ապրում՝ իմանալով այն բաների մասին, որ սովորեցնում է Աստվածաշունչը իրականում։

ԾԱՆՈԹԱՑԻՐ ՔՈ ԱՍՏՎԱԾԱՇՆՉԻՆ

ԱՍՏՎԱԾԱՇՈՒՆՉԸ ընդհանուր առմամբ բաղկացած է 66 գրքերից ու նամակներից։ Այդ գրքերը հեշտությամբ բացելու համար բաժանված են գլուխների ու համարների։ Այս գրքում շատ համարներ են մեջբերված. աստվածաշնչյան գրքի անունից հետո նշված առաջին թիվը ցույց է տալիս տվյալ գրքի գլուխը, իսկ հաջորդ թիվը՝ համարը։ Օրինակ՝ «Բ Տիմոթէոս 3։16» համարի մեջբերումը նշանակում է, որ դա Տիմոթեոսին ուղղված երկրորդ նամակի 3-րդ գլխի 16-րդ համարն է։

Այս գրքում մեջբերված աստվածաշնչյան համարները բաց անելով՝ դու կկարողանաս շատ կարճ ժամանակում ծանոթանալ Աստվածաշնչին։ Իսկ ինչո՞ւ չսկսել կանոնավորաբար ընթերցել Աստվածաշունչը։ Ամեն օր 3–5 գլուխ ընթերցելով՝ դու կկարողանաս ամբողջ Աստվածաշունչը կարդալ մեկ տարում։